काठमाडौं ।
सेकुवा पारखीहरुलाई मौलिक नेपाली स्वाद पस्कँदै आएको चेन रेस्टुरेन्ट बाजेको सेकुवाले काठमाडौंको बाफलमा नयाँ १३औं शाखा सञ्चालनमा ल्याएको छ।
दक्ष युवाहरुलाई उद्यमी बन्न प्रेरित गर्दै देशभित्रै रोजगारी सिर्जना गर्ने उद्देश्य राखेको रेस्टुरेन्टले बाफल स्थित बाजेको सेकुवाको फ्राञ्चाइज राम शरण डङ्गोल, प्रशान्त गीरी, पविन थापालगायतलाई दिएको हो । उक्त फ्राञ्चाइजमा प्रत्यक्ष रुपमा २५ जनाले रोजगारी पाएका छन् ।

उपत्यका बाहिर पोखरा र बुटवलमाफ्राञ्चाइज मोडेलमा रेस्टुरेन्ट सञ्चालन भइरहेको छ भने अमेरिकाको न्यूयोर्क र डालासमा पनि बाजेको सेकुवा ‘द हिमालयन ग्रिल’ का रुपमा सञ्चालनमा छन् ।
बाजेको सेकुवा ब्राण्डमा रेस्टुरेन्ट सञ्चालन गर्न इच्छुक लगानीकर्ताको पहिचान र फ्राञ्चाइज सम्झौता गर्ने काम बाजेको भेन्चरले गर्दै आएको छ ।
यो कम्पनीले कुनै पनि शहरमा रेस्टुरेन्ट सञ्चालनमा ल्याउनु अघि स्थानीय बजारमा उपभोक्ताको खर्च गर्ने प्रवृत्ति, स्थानीय रेस्टुरेन्ट सञ्चालनको सम्भाव्यता अध्ययन गरेर सम्भावना रहेको ठाउँमा मात्र फ्राञ्चाइज विस्तारलाई प्राथमिकतामा पार्ने गरेको सन्चालक चेतन भण्डारीले बताए।
मुख्य व्यापारिक सहरमा बढ्दो उपभोग र बजार मागलाई लक्षित गरी बाजेको भेन्चरले फ्राञ्चाइज मोडलमा रेस्टुरेन्ट सञ्जाल विस्तारलाई अगाडी बढाइरहेको छ ।
नेपालगन्ज, वीरगन्ज, धनगढी, विर्तामोड, हेटौंडा, बनेपा–धुलिखेल र नेपाल बाहिर अमेरिकामा थप केही, अस्ट्रेलिया, जापान, मलेसीया र बेलायतमा आगामी केही वर्ष भित्र रेस्टुरेन्ट सञ्जाल विस्तार गरिसक्ने लक्ष्य रहेको भण्डारीले जानकारी दिए ।
काठमाडौं उपत्यकाको सिनामङ्गलबाट चार दशक अघि सुरु भएको बाजेको सेकुवा रेस्टुरेन्टअन्तर्गत अहिले उत्यकाबाहिर २ ओटा, उपत्यका भित्र ९ ओटा र अमेरिकामा २ ओटा गरी हाल १३ ओटा आउटलेटहरु सञ्चालनमा छन् ।