सुचना, समाचार र मनोरन्जन

पोखरा रङ्गशालामा खेल गतिविधि पुनः सुरु

पोखरा ।

कोरोना कहरका कारण गत चैत १० देखी बन्द भएका रङ्गशाला तथा खेलकूद गतिविधि पुनः सुचारु गर्ने सरकारको निर्णयपछि पोखरा रङ्गशालामा पनि खेल अभ्यास तथा प्रशिक्षण सुरु भएको छ ।

आठ महिना बन्द भएको रङ्गशाला खुलाउन सरकारले निर्देशन दिएपछि खेलकूद शहरको रुपमा स्थापित पोखरामा खेल गतिविधि सुरु भएको जिल्ला खेलकूद विकास समितिका कार्यालय प्रमुख प्रकाश बरालले बताए ।

सरकारले गत मङ्सिर १ पछि खेलगतिविधि शुरु गर्ने निर्णय गरेको थियो ।

रङ्गशाला तथा खेलकूद प्रशिक्षण स्थलहरु लामो समयसम्म बन्द हुँदा खेलाडी तथा प्रशिक्षक अभ्यासबाट बञ्चित भएका थिए । फुटबल, भलिबल, व्याडमिन्टन,बास्केटबल, स्क्वास, क्रिकेट, टेनिस, बक्सिङ, कराँते लगायतका खेलका खेलाडीहरु अभ्यासका लागि रङ्गशाला आउन थालेको उनको भनाइ छ ।

यसैगरी पोखरामा नीजि क्षेत्रबाट सञ्चालित शारीरिक अभ्यास स्थलहरु९जीम सेन्टर ०, फुटसलहरु पनि सञ्चालनमा आएपछि खेल गतिविधि सामान्यीकरण हुँदै गएको बताइन्छ ।

Parichay

कार्यालय प्रमुख बरालले भने, “सरकारले निर्देशनपछि तिहार लगत्तै हामीले बन्द रङ्गशाला खेलाडी तथा प्रशिक्षकहरुलाई अभ्यासका लागि खुला गरेका छौँ । अझपनि कोरोना त्रास कायमै रहेकाले साविकमा जस्तो अवस्था नरहेपनि विस्तारै सामान्यीकरण हुँदै गएको छ , सबै खेलका २५ प्रतिशत हाराहारीमा अभ्यास गतिविधिहरु सञ्चालित छन् ।”

रङ्गशालामा स्वास्थ्य सुरक्षा मापदण्डको पालनाका लागि सबै खेल सङ्घ, खेलाडी तथा प्रशिक्षकलाई आग्रह गरिएको समितिले जनाएको छ । स्वास्थ्य सुरक्षा मापदण्डको पालनालाई पहिलो शर्त बनाइएको बताइन्छ ।

पोखरा रङ्गशालाभित्र मुख्य मुख्य खेलका पूर्वाधार छन् । देशकै सबैभन्दा ठूलो निर्माणाधीन फुटबल रङ्गशालाको काम अन्तिम चरणमा पुगेको छ । फुटबल रङ्गशालासँगै बैकल्पिक फुटबल मैदान पनि बन्दाबन्दीकै अवधिमा निर्माण सम्पन्न गरिएको हो ।

भलिबल,टेनिस,व्याडमिन्टन,बास्केटबल र आर्चरी खेलका पूर्वाधार तथा बहुउद्धेश्शीय कभर्ड हल रङ्गशालाभित्र छ । एकै थलोमा अधिकाँस खेलका पूर्वाधार रहेकाले रङ्गशलाभित्र भीडभाड बाक्लै हुने गर्दछ । क्रिकेट मैदान तयारी तयार रहेपनि पूर्वाधार बनाउन बाँकी छ ।

वर्षभरीनै खेलकूदका प्रतियोगिताहरु भइरहने रङ्गशालाभित्र कोरोनापछि खेलकूद प्रतियोगिता ठप्प छन् । लामो समयपछि बन्द रङ्गशाला खुुलेको र अभ्यास सुरु भएकाले विस्तारै प्रतियोगिता समेत सञ्चालन हुने विश्वास खेलकर्मीको छ ।

व्यायाम व्यवसायी सङ्घका सचिव बलराम सुवेदीले लामो बन्दाबन्दीका कारण ठप्प जीम सेन्टरहरु सञ्चालनमा आएको बताउँदै विस्तारै खेलाडीहरु अभ्यासमा सहभागी हुन शुरु गरेको बताउनुभयो । जिल्लामा ३५ वटा व्यायाम सेन्टरहरु सञ्चालनमा छन् । साङ्केतिक तस्बिर

Comments
Loading...