सुचना, समाचार र मनोरन्जन
Election Commission V2

आधारभूत स्वास्थ्य सेवा निःशुल्क दिन्छौँ: मन्त्री खापुङ

चितवन/

स्वास्थ्य तथा जनसंख्या मन्त्री भवानीप्रसाद खापुङले आधारभूत स्वास्थ्य सेवा निःशुल्क उपलब्ध गराउन सरकार लागिपरेको दाबी गरेका छन । वीपी कोइराला मेमोरियल क्यान्सर अस्पताल भरतपुरको २३ औँ वार्षिकोत्सव तथा १८ औँ क्यान्सर सतर्कता दिवसमा आज सोमवार आयोजित कार्यक्रममा उहाँले स्वास्थ्य चौकी र पालिकास्तरका अस्पतालमा आधारभूत स्वास्थ्य सेवा निःशुल्क उपलब्ध गराइने बताए ।

सरकारले ७८ प्रकारका औषधि निःशुल्क वितरण गरेको र आठ प्रकारका घातक रोग लागेकालाई एक लाख रुपैयाँका दरले वितरण गर्दै आएको उनले बताए । उनले भने ‘तीनै तहका सरकार मानव स्वास्थ्य उपचारका लागि संवेदनशील छन ।’

स्वास्थ्य बीमामा सबैलाई आबद्ध गराउने गरी काम भइरहेको भन्दै उनले अस्पतालको भुक्तानी पाउन बाँकी रकममा छिटो भुक्तानीका लागि आफूहरू तातो लगाइरहेको बताए । सरकार क्यान्सर पत्ता लगाउने पेट स्क्यान मेशिन खरिद गर्ने प्रक्रियामा रहेको भन्दै मन्त्री खापुङले भने, ‘सबैभन्दा धेरै जनताले सेवा पाउने अस्पतालमा पेट स्क्यान मेशिन राख्ने हो ।’ यो क्यान्सर अस्पताल देशकै महत्त्वपूर्ण भएको भन्दै यसको विकासका लागि आफ्नो तर्फबाट सक्दो सहयोग गर्ने उनको भनाइ छ ।

कार्यक्रममा प्रधानमन्त्री कार्यालयका राज्यमन्त्री उमेश श्रेष्ठले क्यान्सर अस्पतालमा अन्य अस्पताललाई जोडेर प्रतिष्ठान बनाउनुपर्ने बताए । उनले भने, ‘छाता ऐन बनाएर प्रतिष्ठान बनाउनुपर्छ ।’ क्यान्सर रोग लाग्न नदिन जनचेतनाका काममा जोड दिनुपर्ने भन्दै उनले यसै अस्पतालमा पेट स्क्यान मेशिन ल्याउनु पर्नेमा जोड दिए ।

यसअघि स्वास्थ्य राज्यमन्त्री रहेर अनुभव संगाल्नुभएका श्रेष्ठले भने, ‘क्यान्सरका ६० प्रतिशत बिरामी यही उपचारका लागि आउँछ, त्यसैले पेट स्क्यान मेशिन यही राख्नुपर्छ ।’ कार्यक्रममै अस्पतालमा कुरुवा घर निर्माणमा आर्थिक सहयोग गर्ने भीम पाठक र अस्पतालका सेवा निवृत्त कर्मचारीलाई सम्मान गरिएको थियो ।

कमेन्ट्स
Loading...