भारतीय जेलमा बिनाकसुर ४० वर्ष कटाएर रिहा भएका इलामका दुर्गाप्रसाद तिम्सिनाले नागरिकता बनाएका छन् ।
उनले बिहीबार बिहान जिल्ला प्रशासन कार्यालय पुगेर नागरिकता बनाएका हुन् । जिल्ला प्रशासन कार्यालय इलामले उनलाई वंशजको आधारमा नागरिकता दिएको हो ।
आवश्यक सबै कागजातसहित जिल्ला प्रशासन कार्यालय पुगेका तिम्सिनालाई प्रमुख जिल्ला अधिकारी ध्रुवबहादुर खड्काले सबै प्रक्रिया पुगेको २० मिनेटमै वंशजका आधारमा नागरिकता प्रदान गरेका हुन् ।
४० वर्ष भारतीय जेलमा बन्दी जीवन बिताएका उनको स्वास्थ्यमा समस्या देखिएकोले प्रदेश सरकारले नि:शुल्क उपचार गर्ने भएको छ ।
यसअघि गत सोमबार कलकत्ता उच्च अदालतले दुर्गाप्रसादलाई क्षतिपूर्ति पाउनु पर्ने बताएको थियो। कलकत्तास्थित नेपाली महावाणिज्यदूत ईश्वरराज पौडेलले क्षतिपूर्तिका लागि आफूले पनि पहल गर्ने बताएका छन् ।