सुचना, समाचार र मनोरन्जन

समता काव्य सन्ध्यामा भानुभक्तको स्मरण

  •  
  •  
  •  
  •  

पोखरा /

कविताको अघोषित पाठ्शालाका रूपमा परिचित पोखरेली युवा साँस्कृतिक परिवारले सञ्चालन गर्दै आएको समता काव्य सन्ध्याको ३ सय ३८ औं शृङ्खला आदिकवि भानुभक्त आचार्यलाई संझदै शनिबार पोखरामा सम्पन्न भयो ।

२ सय ८ औं भानु जयन्तीका सन्दर्भमा पोयुसाँपले भर्चुअल रूपमा भानुका रचना वाचन कार्यक्रम आयोजना गरेको थियो । कोभिड–१९ को दोस्रो लहर र बन्दाबन्दीको असरमा पनि परिवारले आफ्नो नियमित कार्यक्रम समता काव्य सन्ध्यालाई निरन्तरता दिंदै आएको छ । काव्य सन्ध्यामा नेपाल सङ्गीत नाट्य प्रज्ञाप्रतिष्ठान पूर्व कुलपति एवम् परिवारका संस्थापक सचिव सरूभक्तले भानुले जस्तो लोकको हित हुने साहित्य सिर्जना गर्नु आजको आवश्यकता भएको बताए ।वर्षको एक दिन असार २९ गते वा त्यसैको आसपासमा गरिने कार्यक्रमले मात्रै भानुभक्तको उचित सम्मान नहुने बताउँदै उनका बारेमा अझ् धेरै गर्न बाँकी रहेको औंल्याए ।

पोखरा प्रज्ञाप्रतिष्ठानका कुलपति पदमराज ढकालले अमेरिका बसाइमा पनि आँफूले साहित्य, कला र सङ्गीतको उत्थानमा लागी रहेको बताए । काव्य सन्ध्यामा सुबिन रिमाल, सुर्दशन पौडेल, सन्ध्या देवकोटा, सुमित्रा रिमाल, शोभा खनाल, रमा खतिवडा, अम्बिकाप्रसाद भट्टराई, शिव संकल्प, शिव त्रिपाठी लगायतका कविहरूले भानुभक्तका छन्दमय रचनाहरू वाचन गरेका थिए।

‘साहित्य, कला र सङ्गीतको उत्थान : हाम्रो प्रण’को गुञ्जनका साथ विक्रमाब्द २०३४ सालमा स्थापना भएको पोखरेली युवा साँस्कृतिक परिवार गण्डकी प्रदेशको वाङ्मयिक विकासमा ४४ वर्षदेखि अविछिन्न क्रियाशील र सक्रिय संस्थाका रूपमा राष्ट्रिय अन्तर्राष्ट्रि स्तरमा परिचित छ । परिवारको साहित्य विभागकी संयोजक रिता अधिकारीले आमन्त्रित कविहरूलाई स्वागत गरेकी थिइन । पोयुसाँपका अध्यक्ष मोती भुजेलको सभापतित्वमा सम्पन्न काव्य सन्ध्याको सञ्चालन सचिव डा. चैतन्य अधिकारीले गरेका थिए।

कमेन्ट्स
Loading...