सुचना, समाचार र मनोरन्जन

संखुवासभा प्रकरणः तत्काल आवेशमा ६ जनाको हत्या !

  •  
  •  
  •  
  •  
संखुवासभाको मादी नगरपालिका-१ मा भाद्र २१ गते भएको एकै परिवारका ६ जनाको सामुहिक हत्यामा संग्लग्न स्थानीय २५ बर्षीय लोक बहादुर कार्की पक्राउ परेका छन् ।
कार्कीले भाद्र २१ गते छिमेकी ५५ बर्षीय तेज बहादुर कार्की, ५४ बर्षीया कमला भन्ने मनमाया कार्की, ३२ बर्षीया रञ्जना कार्की, ८ बर्षीय बिपिन भनिने दिपेन कार्की, ५ बर्षीया गोमा कार्की र ८४ बर्षीया पार्वती भन्ने पार्वता कार्कीको हत्या गरेकाे प्रहरीले जनाएकाे छ ।
जिल्ला प्रहरी कार्यालय संखुवासभाबाट खटिएकाे प्रहरी टोलीले घटनास्थल सुरक्षित राखेको तथा थप अनुसन्धानको लागी संघीय प्रहरी ईकाई कार्यालय धरानबाट कुकुरसहितको प्रहरी टोली, १ नम्बर प्रदेश प्रहरी कार्यालयको अनुसन्धान टोली तथा केन्द्रीय अनुसन्धान ब्युरोको प्रहरी टोली समेत परिचालन भएको थियो ।
घटनाको सुक्ष्म तथा गहन अनुसन्धान गरिरहेको प्रहरी टोलीलाई थप सहजताको लागि अनुसन्धानको नेतृत्व गर्न १ नम्बर प्रदेश प्रहरी कार्यालय बिराटनगरबाट खटिनुभएका प्रदेश प्रहरी प्रमुख प्रहरी नायव महानिरीक्षक अरुण कुमार बि.सी. सहितको अनुसन्धान टोलीले सामुहिक हत्यामा संग्लग्न रहेका कार्कीलाई घटना भएको छैटौ दिनमा पक्राउ गरी प्रदेश प्रहरी प्रमुख सहितको उपस्थितिमा आज ईलाका प्रहरी कार्यालय चैनपुरमा पत्रकार सम्मेलन गरी सार्वजानिक गरेकाे जनाइएकाे हाे ।
पक्राउ परेका कार्की बैदेशिक रोजगारीको शिलशिलामा पटक पटक बिदेश गएता पनि स्थास्थ्यमा समस्या आई घर फर्की बसिरहेको र आफू बिदेशमा रहँदा केही कमाउन नसकेको प्रति हिनताबोध भई समय समयमा बिक्षिप्त हुने गरेको र आफै आवेश तथा आक्रोश आई परिवारकै हत्या गरेको प्रारम्भिक अनुसन्धानबाट खुल्न आएको छ ।
अभियुक्तका काका समेत रहेका मृतक तेज बहादुर कार्कीले समय समयमा सम्झाई बुझाई गर्दै आईरहेकोमा घटना भएको दिन बिहान मृतक तेज बहादुर कार्की अभियुक्तको घरमा खेताला भन्न गई फर्कने क्रममा अभियुक्तले बिगतमा आफूलाई सम्झाई बुझाई गरेको शब्दहरुलाई गाली गलौजको रुपमा लिई तत्काल आवेशमा आई नजिकै रहेको दाउराको चिर्पटले टाउको पछाडि प्रहार गरी हत्या गरेको खुल्न आएकाे प्रहरीकाे भनाइ छ ।
तेज बहादुरलाई चिर्पट प्रहार भए पश्चात हार गुहार गर्दा श्रीमती र बुहारी समेत घटनास्थलमा पुगेकोमा निजहरुलाई समेत प्रहार गरेको साथै घर नजिक बाटोको डिलमा रहेका दुई जना नावालकलाई समेत चिर्पटले प्रहार गरी हत्या गरी घरमा रहेकी पार्वता कार्कीलाई कपालमा समातेर भित्तामा टाउको ठोकाई हत्या गरी घटनामा प्रयोग भएको दाउरा घरमा लगेर आगो बालेको अनुसन्धानको क्रममा खुल्न आएको छ।
शुरुमा तेज बहादुरको  हत्या गरेको घर परिवारका अन्य सदस्यले समेत देखेको हुँदा घटनालाई ढाकछोप गर्न परिवारकै हत्या गरेको अनुसन्धानको क्रममा खुल्न आएको छ । पक्राउ परेका कार्कीको सम्बन्धमा जिल्ला प्रहरी कार्यालय संखुवासभाबाट थप अनुसन्धान तथा कानूनी कारवाही भईरहेको प्रहरीले जनाएकाे छ ।
कमेन्ट्स
Loading...